Bjórbók.net

Bjórbókin kom upphaflega til sögunnar sem eins konar bókhaldskerfi fyrir sjálfan mig til að auðvelda mér að muna hvaða bjóra ég hafði smakkað og hvort þeir voru góðir eða vondir.  Í bókinni er að finna einkunnargjöf fyrir hvern bjór sem og nokkur orð um hvernig ég upplifði bjórinn ásamt merkimiðanum af flöskunni.  Bók þessi er því orðin eins konar bjórsafn og hefur vakið þó nokkra athygli þeirra sem komist hafa í hana. Menn hafa hvatt mig til að birta bókina á einhverjum vettvangi og hef ég því ákveðið að skella henni upp hér á veraldarvefnum undir nafninu bjórbók.net.  Þegar bókin er skoðuð skal það haft í huga að hér fer einungis fram mat áhugamanns um bjór en ekki sérfræðings, og svo er bjórmat svo persónulegt að ekkert er rangt eða rétt þegar komið er að því hvaða bjór þykir góður eða vondur.  Ég  vona nú samt að bók þessi  verði einhverjum hvatning til að kanna þá óendanlegu möguleika sem standa manni til boða þegar bjór er annars vegar, sem og að aðstoða menn við sín fyrstu skref í bjórsmökkun.  Þó svo að enginn geti sagt manni hvað manni þykir gott þá getur mat annarra samt gangast sem ákveðinn leiðarvísir.

Bjórsmökkun er gríðarlega skemmtileg og spennandi iðja því maður veit í raun aldrei hvað maður á í vændum í næstu flösku.  Verður það vondur eða góður bjór eða er þar á ferð hrein fullkomnun?  Fyrst um sinn er bara gaman að upplifa  mismunandi góða bjóra en  síðar fer maður svo virkilega að finna úr hvaða hráefnum bjórinn er.  Maður fer að greina alls konar bragðgerðir sem maður tók ekki eftir áður.   Þetta er í raun nákvæmlega eins og með rauðvínið sem menn snobba svo voðalega mikið fyrir í dag.  Rauðvínsspekúlantar geta talið upp heilu klausurnar af fyrirbærum sem þeir vilja meina að séu til staðar í víninu og sumir telja sig jafnvel geta sagt til um hvaða plöntur spretta í nágrenni vínekrunnar.  Það þykir voða flott að vita sínu viti um rauðvín og að geta mælt með ákveðinni gerð þrúgu og þess háttar á meðan bjórinn er ekki eins vel metinn.  Í raun er sorglegt hve mikið bjórinn hefur fallið í skuggann af rauðvíninu og vona ég svo innilega að menn fari nú að pæla meira í þessum merka drykk og koma fram við hann af meiri virðingu.
Að setjast niður og slappa af með uppáhalds bjórinn sinn er bara svoooo ljúft og það gefur rauðvínsglasinu ekkert eftir.

Hafa skal í huga að stöðugt bætast við bjórbókina nýir bjórar og einnig er síða þessi fjarri því að vera fullgerð.  Það eru því miklar breytingar í gangi og menn verða að kíkja inn við og við til að sjá hvað er nýtt.  Bjór mánaðarins og nýtt í bók eru t.d. linkar sem ættu stöðugt að uppfærast.