ATHUGASEMDIR:  Kwak er mjög sérstakur belgískur bjór sem erfitt er að flokka eftir stíl.  Hann er dreginn í sama dilk og belgísk sterk öl en í raun á hann sér enga hliðstæðu.  Bjórinn er nefndur eftir Pauwel Kwak sem fyrstur bruggaði hann árið 1791 en sumir vilja meina að nafnið sé til komið vegna þess að það heyrist "kwak" þegar maður þambar bjórinn úr sínu afar sérstaka glasi - skemmtileg pæling en þó ekki rétt.  Glasið var hannað á sínum tíma fyrir ökumenn hestvagna þannig að þeir gætu notið bjórsins án þess að fara úr vagninum.  Tréstatífið í dag minnir á höldurnar á vögnunum sem héldu á bjórnum.   Bjór þessi ilmar afar vel með bönunum, sætu malti og kandís. Í munn er hann sæmilega fullur með malti, brenndan sykur eða karamellu og ögn frúttaður.  Eftirbragðið er afar gott og að mínu mati betra en sjálft bragðið.  Þetta er mikill bjór og öflugt alkóhólið hitar mann allan upp.  Þennan drekkur maður bara í rólegheitum einn til tvo en fleiri er vís bani.  Þó hér sé afar frægur og vel metinn bjór frá Belgíu þá bara get ég ekki gefið honum neina svaka einkunn. Ég er bara ekki að fíla hann.  Þetta er þó bjór sem maður VERÐUR að prófa og þá auðvitað í sínu rétta glasi.