Í augum margra skiptir ekki nokkru máli úr hvaða íláti bjór eða hver annar drykkur er drukkinn, bara að þeir  komi honum ofan í sig og þá eru þeir sáttir!  Auðvitað er þetta ekkert stórmál, menn hafa jú sína hentusemi.  Hins vegar eru til þeir  sem vilja njóta síns bjórs til fulls og fá nákvæmlega það út úr bjórnum sem bruggarinn ætlaðist til.  Ég segi fyrir mitt leiti að ég get t.d ekki hugsað mér að drekka rauðvín úr mjólkurglasi eða kaffi úr freyðivínsglasi, þó svo að bragðið sé nánast það sama þá er það eitthvað sem skemmir fyrir. Bragð er ekki allt þegar matur og drykkur er annars vegar, það er að vísu stór þáttur en útlit og stemning kemur einnig við sögu.  Þannig er þetta líka með bjórinn, að drekka bjór úr kaffibolla er bara ekki það sama og að drekka hann úr fallegu glasi þar sem froðan og liturinn fær að njóta sín til fulls og réttur skammtur af lykt skilar sér til neytandans.   Það er ástæða fyrir því að nánast er til sérstakt glas fyrir hverja einustu bjórtegund.

Ég er ekki að segja að ómögulegt sé að njóta bjórs nema með akkúrat rétta glasinu, síður en svo. Hins vegar er mjög gaman til þess að vita að maður er að drekka bjórinn eins og hann á að bragðast þegar maður er með rétt glas.  Svona glös eru samt heldur dýr og oft erfitt að nálgast þau en menn verða þá að reyna að nota  glös með svipaða lögun undir bjóra sína.  Reyndar skiptir ekki miklu máli hvernig hinir fjöldaframleiddu lager bjórar eru drukknir, þeir bragðast eins í hvaða glasi sem er, það eru aðallega hin flóknu og miklu öl sem menn eru að einbeita sér að.

En af hverju skiptir  lögunin svona miklu máli?  Eins og fyrr segir þá fer það eftir gerð bjórsins og eiginleikum hans hvernig glas hentar best.  T.d. má nefna hin tignalegu þýsku hveitibjórs glös (sjá mynd að ofan) en þau eru há og víkka svo að ofan.  Þessi lögun er ætluð að varðveita hina miklu froðu sem myndast þegar hveitibjór er hellt í glas.  Væri glasið lágt og opið myndi froðan alls ekki njóta sín.  Hið glæsilega Duvel glas er á sama hátt hannað til að halda sínum efnismikla froðuhaus óskemmdum á meðan neytandinn drekkur úr glasinu og andar að sér hinni ljúfu angan.  Lögunin gerir það að verkum að bjórinn rennur undan froðunni.  
Líkt og freyðivín þá eru svo sumir bjórar eins og t.d. sumir belgísku Lambic bjórarnir sem njóta sín best í háum mjóum glösum sem kallast "fluted glass".  Glös þessi eru mjög lík háum freyðivínsglösum en þeim er ætlað að halda lengur í gosið í bjórnum.  Fallegar gosbólurnar þurfa að fara lengri leið upp á yfirborðið og staldra því lengur við í drykknum.  Að auki styrkir mjó hönnunin lykt bjórsins og beinir henni beint að vitum neytandans.

Hinir belgísku klausturbjórar (trappist og abbey) eiga líka sinn stíl af glösum sem kallast bikar eða goblet.  Þessi glös eru voldug og afar glæsileg en lögun  þeirra leyfir mikla innöndun af hinni massífu lykt.  Glösin eru vel opin og víð þannig að gosmikill bjórinn á auðvelt með að mynda fallegan froðuhaus og það er gott aðgengi að sjálfum bjórnum.  Bikar er líkt og koníaksglasið...maður getur hitað bjórinn upp í höndunum með því að halda utan um botninn og aukið þannig lyktarmassann eða dregið úr upphitun með því að halda um voldugan fótinn.

Ekki eru öll bjórglös úr gleri því til eru postulíns eða steinglös, trébikarar og glös eða krúsir úr málmi.  Slík glös eins og t.d. málmkrúsin eða "tankard" viðhalda hitastigi bjórsins og þar sem þessi gerð bjórglasa er ekki gegnsæ þá er ekki unnt að sjá tærleikann og lit bjórsins heldur verður að treysta meira á lyktar og bragðskynið.  Hér reynir meira á að bjórinn sé virkilega góður þar sem fallegt útlitið er ekki að slá ryki í augu neytandans.  En glasalistinn er langur og ég hef hvorki tíma né pláss til að fara ofan í hann allan hér.  Ég vildi aðeins benda á að úrvalið er mikið og að hér er heilmikil pæling sem liggur að baki.  Glösin eru einnig mikil stofuprýði og oft vel vandað til verksins og tilvalið er að safna þessum gripum.  Ég  reyni t.d.að komast yfir réttu glösin fyrir þá bjóra sem ég held mest upp á.....það er bara svo mikil stemning í kringum þetta, að geta boðið upp á góðan bjór í sínu rétta glasi er  ómetanlegt!   Mér hefur samt reynst erfitt að koma höndum yfir þessi glös því auðvitað fæst ekkert hérlendis nema þá kannski ýmsar gerðir pilsner glasa.  Hins vegar hef ég grafið upp nokkrar heimasíður sem selja glös og læt ég hér flakka eina ameríska.  http://www.vbdw.com/vbdw/glassware.htm -  Sjálfur hef ég ekki verslað við þessa gaura en mér sýnist þeir vera góðir.  Sú síða sem ég hef hins vegar verslað mest við virðist vera horfin?   En nóg um glervöruna!