Alla bjórstíla má flokka annað hvort sem öl eða lager eftir því hvaða ger er notað sem og hitastig og gerjunartíma.  Úrvalið er gríðarlegt og hér verður aðeins tiplað á stóru og farið í nokkra af helstu bjórstílum veraldar svona rétt til að skoða toppinn af ísjakanum.  Íslensku þýðingarnar hér að neðan eru þau nöfn sem ég hef notað yfir þessa bjórstíla og eru alls ekki löggiltar skjalaþýðingar  : )

Abbaye Öl  - Klausturbjórar :
Abbaye þýðir klaustur og er notað yfir belgískan bjórstíl sem bruggaður var í klaustrum í gamla daga til að hjálpa munkunum í gegnum föstuna. Í dag eru ekki allir klausturbjórar ekta klausturbjórar, þ.e.a.s. bjór sem er bruggaður innan veggja raunverulegs klausturs og af raunverulegum munkum.  Til að greina á milli þessara ekta og óekta klausturbjóra er orðið Trappist sett á hina raunverulegu klausturbjóra.  Þetta eru þó allt klausturbjórar í þeim skilningi að þeir eru bruggaðir á sama hátt og þeir eru yfirleitt mjög sterkir (hvað alkóhól varðar), bragðmiklir, stundum sætir og oft dálítið frúttaðir.
Klausturbjórar er nær eingöngu framleiddir í Belgíu en þó eru undantekningar eins og t.d. Trappist bjórinn frá Hollandi (Koningshoeven).  Í dag eru aðeins til 6 brugghús/klaustur í heiminum sem brugga hina raunverulegu klausturbjóra (Trappist) , 5 í Belgíu og svo eitt í Hollandi.

Dæmi um klausturbjóra : Leffe Blond, Leffe Bruin, Chimay

Altbier - Gamli bjór :
Alt þýðir gamall á þýsku og er notað yfir bjórstíl (t.d. Dusseldorfer alt) í Þýskalandi sem er bruggaður með gömlu aðferðinni þ.e.a.s. eins og bjórinn var bruggaður fyrir 19. öld. Alt bjór er bruggaður með öl-sveppnum Saccharomyces cerevisiae og er því Öl. Bjórinn var geymdur í ísköldum hellum í langan tíma að gerjun lokinni til að draga úr hinum frúttaða eiginleika ölsveppsins.  Þetta eru oft rammir bjórar með ríkt humalbragð.

Barley Wine - Vín bjór:
Þetta er breskur bjórstíll (British strong ale) sem tilheyrir Öl-fjölskyldunni og er afar sterkur og svipar að því leiti til víns.  Alkóhólmagnið getur verið frá 6 og upp í 12 % þannig að menn eru að fá eitthvað fyrir sinn snúð hér.  Oftast er bjórinn rauðleitur eða koparlitaður (amber).  Barley Wine eru góðir bjórar til geymslu og batna  með aldrinum.

Bitter - Bitur :
Bitter eða Bitur eins og ég vil kalla hann er vel humlaður en þó ekki of rammur eins og ætla mætti  af nafninu .  Þessi enski öl er ekki gosmikill bjór.  Brons og allt upp í dökk kopar rauður að lit!

Bock :
Upprunalega voru Bock bjórar hið fljótandi brauð hina fastandi munka (ekki slæmt að fasta í þá daga).  Bock bjórar sem upprunalega koma frá Þýskalandi eru afar alkóhólríkir, maltaðir og oftast dökkir lager bjórar sem bruggaðir voru á haustin eða veturna og svo drukknir á vorin.

Cream Ale - Rjóma Öl :
Þessi stíll hljómar rosalega djúsí ekki satt? Hins vegar er í raun ekkert sem minnir á rjóma í þessum stíl og skil ég ekki alveg hvaðan nafnið kemur.  Rjóma öl er eins og nafnið gefur til kinna bruggaður með Öl svepp en svo er bjórinn látinn eldast í kulda líkt og lager. Stundum er jafnvel lager blandaður saman við ölið.  Útkoman  er  svo mildur, gylltur, full skrokka föl öl sem upprunninn er frá Ameríku.

Dæmi um Cream Ale : Reds Eric's Cream Ale

Dortmunder Export - Dortmúndari :
Hér er á ferð mjög vinsæll bjórstíll sem upprunalega var bruggaður á svæðinu í kringum borgina Dortmund í Þýskalandi.  Dortmúndarinn er oftast fullskrokka eðal lager sem er einhvers staðar á milli þurra þýska pilsnersins og hinum sætari maltaða Munchen helles bjór.  Viðskeytið "export" þýðir ekki að þetta sé útflutt heldur bendir það til þess að þetta sé eðal lager eða premium lager.

Eisbock - Ísbokk :
Þetta er lager sem er búinn til með því að frysta bock bjór að gerjun lokinni.  Þetta er í raun ansi sniðug leið til að búa til alkóhól ríkan bjór því ísinn er fjarlægður, sem er að mestu vatn, og eftir stendur mun sætari, þyngri og sterkur alkóhól ríkur bjór.  Maður ætti að geta búið til svona bjór heima í frysti eða hvað?  : )

Faro - Faró :
Faró er einn af þessum dularfullu belgísku öl bjórum sem sprottnir eru af hinum svo kallaða Lambick stíl. Faró er fölur eða brúnn Lambick sem upprunalega var framreiddur af krana á svæðunum í kringum Brussel.  Þessi bjór er gerjaður af viltu geri og örverum og svo endurgerjaður með kandís sykur eða karamellu, afurðin er svo líflegur, örlítið sætur en þó súr bjór sem minnir ögn á vín.  Gott dæmi er Frank Boon Pertotale.  Faró er mjög erfitt að nálgast í dag en þessi bjórstíll er nánast í útrýmingarhættu og er aðeins hægt að fá í Belgíu.

Framboise :
Framboise er einn af hinum hressandi ávaxtabjórum frá Belgíu.  Þetta er belgískur Lambick bjór sem bragðbættur er með hindberjum , hann er snarpur, freyðandi og hressandi og mjög lítið humlaður. Mjög spennandi bjórstíll!

Grand Cru :
Þessi belgíski bjórstíll var áður bruggaður og geymdur og svo aðeins tekinn fram við sérstök tilefni á borð við giftingar, þorps hátíðar og aðrar merkilegar uppákomur.  Grand Cru er rauður bjór eða rautt öl og hann er oftast mjög alkóhólríkur.  Bjórinn er látinn þroskast lengi í viðartunnum en við það fær hann mjólkurkennt og dálítið súrt bragð.

Gueuze :
Þetta er einn af eðalbjórum Belga sem oft hefur verið líkt við Kampavín.  Þessi bjórstíll er búinn til með því að blanda saman gömlum þroskuðum Lambick við ungan Lambick .  Blandan er svo látin endurgerjast í flöskunni í lágmark eitt ár.  Gueuze er oftast í flöskum lokuðum með vírnetuðum korktappa líkt og kampavínsflöskurnar og bjórinn er frískandi og freyðandi.  Mjög spennandi stíll sem allir ættu að prófa ef tækifæri gefst.

Dæmi - Cantillon Gueuze

Indian Pale ale - Indverskur föl öl :
Þetta er eins konar afbrygði af enskum föl öl sem er afar vel humlaður.  Í raun er þetta enskur öl sem fluttur var til nýlendanna í Indlandi í gamla daga.  Hátt humal magnið og ríkulegt alkóhólinnihald gerði það að verkum að bjórinn hélt ferskleika sínum eftir langar siglingar frá Englandi til Indlands.  Þessi stíll var afar vinsæll á meðal breskra hermanna í Indlandi.

Kölsch - kölski :
Kölski er gamall þýskur bjórstíll upprunninn frá Köln fyrir tíma lagersins.  Þetta er ljós og stundum gruggugur öl með léttum humlum og dálítið þurr.  Frekar alkóhólríkur og örlítið mjólkurkenndur.

Kriek - kirsuberjabjór :
Þetta er enn eitt belgíska undrið sem gerður er úr Lambic sem bragðbættur er með kirsuberjum.  Berin eru marin og sett saman við bjórinn í síðari gerjun.  Afar frískandi bjór!

Lambic - villibjór :
Þetta er elsti bjórstíll veraldar og er sá bjórstíll sem kemst næst hinum forna upprunalega bjór.  Lambic er belgískur hveitibjór sem gerjaður er með villtu geri og örverum úr andrúmsloftinu. Gerjunin fer fram í stórum eikartunnum sem geymdar eru í drungalegum köldum kjöllurum.  Lambic verður að innihalda lágmark 30% hveiti til að kallast ekta og er hveitið venjulega ómaltað.  Bjórinn er gruggugur, gulur, létt humlaður, froðukenndur og örlítið súr .  Lambic er svo oft bragðbættur með ýmsum ávöxtum svo sem ferskjum (peche), kirsuberjum (kriek) og hindberjum (framboise).  Vilji maður fá fortíð í flösku þá verður maður að smakka þennan.

Marzenbier - Mars bjór :
Þýskur hátíðarbjór sem vinsæll er á hinum fræga októberfest í Þýskalandi. Þetta er mjúkur, maltaður koparlitaður lager sem bruggaður er í mars og látinn eldast fram í september lok eða byrjun október.  Þýskir og tékkneskir humlar í mjög góðu jafnvægi.

Munchener Dunkel :
Þessi dökki  lager er sá lager sem fyrst kom til sögunnar og markaði upphafið að algjörlega nýrri bjór fjölskyldu.  Dunkelinn fæddist í Spaten-brugghúsinu í Munchen í Þýskalandi um miðja 19. öld og vakti strax heimsathygli.  Bjórinn er nokkuð maltaður bæði hvað varðar bragð og lykt en samt í góðu jafnvægi með þýskum humlum.  Lítið rammur og léttur bjór.

Oud Bruin - Gamli brúnn :
Gamli brúnn er dökkrauður og stundum svartur belgískur öl sem kemur frá flæmsku héruðum í Belgíu og sérstaklega í kringum bæinn Oudenaarde.  Bjór þessi er frumgerjaður í langan tíma og svo í enn lengri tíma í síðari gerjun og þá oft í viðar tunnum þar sem sýrandi bakteríur komast í hann.  Afraksturinn er vel þroskaður, örlítið súr og sýrður bjór með nokkuð vínlegan karakter.  Í suma gamla brún er bætt út í kirsuberjum eða hindberjum og heita þeir þá Kriek og Frambosen.  Flöskurnar eru fallega  vafðar inn í eins konar smjörpappír!

Pale Ale - Föl Öl :
Þessi öl var fyrst bruggaður í Burton-on-Trent í Englandi á 18. öld og var víða mjög vinsæll bjórstíll.  Þó nafnið bendi til þess að bjórinn sé ljós þá er hann í raun frekar dökkur eða brons / koparlitaður, hins vegar er hann mun ljósari en hinir svörtu og dökkbrúnu Portarar og Státar.  Föl ölið er vel humlaður , nokkuð rammur og fullskrokka bjór.

Pilsner :
Pilsner er án efa frægasti og vinsælasti bjórstíll heimsins uppruninn frá Pilsen í Bæheimi 1842.  Þessi tékkneski bjórstíll tók við af hinum dökka Munchen lager og hefur allar götur síðan verið fyrirmynd annarra lager bruggara í heiminum.  Orðið pilsner þýðir í raun sama og ljós lager, en stundum ruglar þetta menn í ríminu.  "Pilsner" ætti maður kannski bara að nota um ljósan lager sem er bruggaður á sama hátt og sá upprunalegi

Dæmi um pilsner er Pilsner Urquell

Porter - Portari :
Portari er dökkur og frekar sterkur öl sem upprunalega varð til þegar menn blönduðu saman ódýrum óþroskuðum bjór (mildum brúnum bjór) við dýrari eldri bjór.  Portarinn er með kryddaðan súkkulaði karakter og gerður úr enskum humlum.  Lakkrís rót, súkkulaði malt, svart malt, og ýmislegt fleira eru dæmi um hráefni sem notuð hafa verið í bruggun portara í gegnum tíðina.

Reyk bjór / Rauchbier :
Þessi þýski bjórstíll varð frægur í Bamberg í norður Bæheimi á árum áður.  Bjór þessi er þýskur lager sem bruggaður var á svæðinu en "reyk" viðurnefnið kom vegna þess að maltið sem notað var í bjórinn var þurrkað yfir opnum eldi og fékk því reyktan karakter fyrir vikið.

Saison - Árstíðarbjór :
Saison (árstíðar bjór) er belgískur bjórstíll eða sumar öl sem ættaður er frá frönsku mælandi suðurhluta Belgíu. Bjór þessi var venjulega bruggaður á veturna eða vorin og svo geymdur fram á sumar og drukkinn yfir sumarmánuðina. Saison bjórar þurftu að vera  frekar humlaðir til að haldast ferskir yfir sumarið en þó ekki of rammir svo þeir væru svalandi á heitum sumardegi.    Þessir bjórar eru líka þekktir fyrir að vera afar gosmiklir en gosið safnast fyrir í flöskunni yfir geymslutímann. Oft er svo ýmsum kryddum eða jurtum bætt við til að lífga bjórinn aðeins við.  Nú á tímum er afar fá brugghús sem brugga þessa bjór perlu og má segja að stíll þessi sé að deyja út.

Stout - Stát :
Þessi afkomandi portara er oftast svart eða dökkbrúnt öl sem inniheldur hátt hlutfall ristaðs korns.  Státar eru oft sætir og mjög maltaðir en einnig eru þeir oft rammir og þurrir.  Þetta eru mjúkir bjórar, stundum mjólkurkenndir og oftast með fína mjúka froðu.  Algengt er að finna reykt bragð, kaffi og stundum súkkulaði.

Dæmi um sætan stát er Samuel Smith's Outmeal Stout.

Dæmi um þurran stát er Guinness og Murphy's Irish Stout